Hyderabad: Telangana ke Chief Minister A. Revanth Reddy ne BJP par seedha aur teekha hamla karte hue kaha ki Prime Minister sabhi Chief Ministers ke ‘elder brother’ hote hain, isliye unhe CMs ki maangon ko maanna chahiye.
CM Revanth Reddy ne kaha, “PM PM hote hain aur main CM hoon. Is naate PM ko CMs ki requests par dhyan dena chahiye.” Unhone temple funding ke mudde par BJP ko gherte hue kaha ki Telangana sarkar mandiron ke redevelopment ke liye funds de rahi hai, jabki BJP mandiron aur dharm ke naam par vote maang rahi hai.
Unhone saaf shabdon mein kaha, “Hum dharm ya mandir ke naam par vote nahi maangte. Hum BJP jaise nahi hain. Hum apni zimmedari nibha rahe hain. Hum sabhi mandiron ko funds de rahe hain, bina kisi dikhave ke.”
Language aur rajneetik bayano par baat karte hue CM ne kaha ki log khud jawab denge. “Log unki bhasha ka jawab denge. Har kisi ko jawab milega. 11 February ko log faisla karenge.”
Southern states ke saath anyaay ka aarop lagate hue Revanth Reddy ne kaha ki BJP sarkar Bihar, UP aur MP ko special packages de rahi hai, jabki dakshini rajyon ko second-grade citizens ki tarah treat kiya ja raha hai. Unhone is mudde ko NITI Aayog ke saamne bhi uthaya aur ise bilkul galat bataya.
CM ke is bayaan ke baad rajneeti aur tezi se garma gayi hai, aur 11 February ko hone wale faisle par sabhi ki nazar bani hui hai.