Hyderabad: Commissioner’s Task Force (West Zone) ne bina medical prescription aur drug licence ke jawanon ko steroid injections farokht karne ke jurm mein ek shaks ko giraftar kiya hai. Giraftar shuda mulzim ki shanakht Mohd. Faisal Khan (25) ke taur par hui hai, jo furniture business se wabasta hai aur baqaida gym jata tha.
Police ke mutabiq, mulzim ko gym jaane wale jawanon mein tez muscles banane ke liye steroid injections ki zyada demand ka andaza hua. Is demand ka faida uthate hue usne Surat se ghair qanooni tareeqe se steroid injections hasil kiye aur bina kisi valid drug licence ya doctor ke prescription ke unhein mehngi qeemat par apne pehchan walon ko farokht karta raha.
Qabil-e-aitemad ittila par karwai karte hue, Commissioner’s Task Force West Zone team ne Asian Theatre, Attapur ke qareeb mulzim ko giraftar kar liya. Talashi ke dauran steroid injections, syringes aur ek mobile phone baramad kar ke zabt kiya gaya. Police ka kehna hai ke is qisam ki ghair qanooni dawaon ki farokht se jawanon ki sehat ko shadeed nuqsan pohanch sakta hai aur public health ko bhi khatra hota hai.
Zimmedar afsaran ne intibah diya hai ke steroid ka ghalat istemal addiction, organs ko nuqsan, infertility aur hatta ke maut tak ka sabab ban sakta hai. Fitness discipline aur mehnat se hasil hoti hai, khatarnak shortcuts se nahi. Awam se appeal ki gayi hai ke aisi ghair qanooni drug farokht ki kisi bhi ittila ko foran police ke hawale karein.